CIWON HAUKA/CUTAR KWAKWALWA

Ciwon hauka kamar sauran cututtuka irin su Malaria, Typhoid, Ulcer dss, yana iya kama kowane mutum. Hakanan, kamar ciwon wasu sassan jiki: ciwon kunne, ido, haƙori, sanyin ƙashi/kafa dss ita ma kwakwalwa kan iya shiga ɗan ruɗu na ‘yan wasu lokuta. 

Ba kuma sai lalle sai mutum yana yawo cikin ƙazanta ko surutai barkatai ba ne yake da cutar kwakwalwa, da yawan cututtukan kwakwalwa suna bayyana ne a cikin halayyarmu da mu’amalarmu ta yau da kullum (mis. personality disorder), kuma ɗaiɗaikun mutane ne suka tsira daga wasu dangogin cututtukan kwakwalwa. 

Wasu daga cikin cututtukan kwakwalwa na samun wasu mutanen ne saboda wasu abubuwa da suka same su a baya na tsoro (mis. Phobias), cin amana (mis. Pistanthrophobia), rasa wata dama ko wani/mutum (mis. PTSD) kowa ya danganta da nasa [Rachman, 1978], kuma suna da matuƙar tasiri a mu’amalar mutum, kamar sa yawan tsoro, kaɗaici, tsoron mace/namiji, yawan fushi, mahaukacin son kudi, ƙin shiga cikin mutane, yawan mantuwa, shaye-shaye dss wasu tun daga yarinta. 

Shi ya sa, kafin ka yi mu’amala da wasu mutane ko aure, yana da kyau ka san lafiyar kwakwalwarsu. Kuma hira da ake tsakanin saurayi da budurwa, dama ce ga masu niyyar aure da ya kamata su fahimci junansu; amma abin haushi sai an shiga gida ne ake wannan ƙoƙarin, daga ƙarshe sai ka ga auren baya jimawa.   

Wasu daga cikin cututtukan haukan suna buƙatar ganin likitan kwakwalwa da yanayin halayya (Psychotherapist) [Jeffrey 2004], wasu kuwa na buƙatar nuna kulawa daga ‘yan uwa (rarrashi, ta’aziyya, jaje dss) ko magunguna da suka danganci wannan matsalar [Stahl, 2008]. Amma mafi ƙololuwar abin da mutum zai lazimci yi don sauƙaƙawa kansa sarrafa kwakwalwa/tunani shi ne lazimtar Zikiri (Karatun Alkur’ani, Istigfari, Salatin Annabi (S.A.W.), dss) [Ar-Ra‘d 13:28]  

© Aliyu M. Ahmad

05051442AH 21122020CE