SUNAN ALLAH ﷻ

Sunan 'Allah' keɓantaccen suna (proper noun) ne, a ƙa'ida ana rubuta harafin farko na keɓantaccen suna (proper noun) da babban baƙi (capital letter) [Huddleston et al, 2002].

Na biyu, girmamawa ne rubuta sunan Allah ko lamirinSa (pronoun) da babban baƙi, kuma ya saɓawa ƙa'idar rubutu (othorgraphy/قواعد الاملاء) rubuta 'proper noun' da ƙananan baƙi. 

Misali:

Harafin farko (a) a sunan Allah da babban baƙi ake rubuta ta:

(A)llah ✅ ba 'allah' ba ❌

Haka wajen rubuta lamiri (pronoun), ko mallaka (possessive) ko aikatau (verbs) da ya danganci Ubangiji, ana fara rubuta shi da babban baƙi. Misali:

-------------------------------------------------

• KATSATTASEN LAMIRI (PERSONAL PRONOUNS)

"Godiya ta tattaba a gare (S)hi"

[Rum, aya ta 18].

NB: 

Kalmar 'shi' ta fara da babban baƙi.

-------------------------------------------------

• LAMIRIN MALLAKA (POSSESSIVE PRONOUNS)

...da mala'ikun(S)a, da manzannin(S)a, da littafan(S)a... 

[Baqara aya ta 285].  

NB: In mun lura, kalmar mallaka (sa) tana farawa da babban baƙi, saboda nunin mallaki ne ga Allah.

-------------------------------------------------

• SIFFA (ADJECTIVES)

Misali:

"Allah (M)asani ne ga abin da ke cikin ƙiraza."

[Ali-Imran, aya ta 153]. 

NB: Kalmar 'masani' ta fara da babban baƙi.

"Da sunan Allah Mai rahama, Mai jin ƙai"

[Fatiha, aya ta 1].

Kalmar 'mai' ta fara da babban baƙi, amma wacce take biyo bayanta (rahama, jin ƙai...), za a barta da ƙananan baki. Sauran misalai, Mai ji, Mai gani, Mai basira, Mai....

-------------------------------------------------

• AIKATAU (VERBS) 

"Allah (Y)ana halitta abin da (Y)ake so"

[An-Nur, aya ta 45]

Kalmomin 'yana' da 'yake' suna nuni da aiki, sun fara da babban baƙi na 'Y' saboda nuni da keɓewa da kuma girmamawa gare Shi (Allah).

وصلى الله على نبينا وحبيبنا محمد ﷺ وعلى أزواجه وذريته وصحبه وسلم.

✍️ Aliyu M. Ahmad 

10th Dhul-Qaadah, 1443AH

10th June, 2022CE

Photo Credit: The Humblei