GUZURIN RAMADHAN XI: RUKUNIN AZUMI NA UKU (KAMEWA)

GUZURIN RAMADHAN XI: RUKUNIN AZUMI NA UKU (KAMEWA)

MA’ANAR KAMEWA

Kalmar ‘kamewa’ ita ce fassarar kalma Larabcin nan ta "الإمساك", ma’anarta a Shar’ance kamewa daga  ci (cin abinci), sha (duk wani abun sha), Jima’i (walau na aure ko waninsa), kame harshe (daga karya, zance batsa, gulma, annamimanci da sauransu), da kowane irin abu ko aiki da zai iya batawa Mai Azumi Azumi sa, daga fitowar Alfijir zuwa faduwar rana.

MATSAYIN KAMEWA

Kamewa dayane daga cikin rukunan azumi uku da aka ambata a baya (Niyya, Zamani kamewa da kuma kamewa).

HUJJAR KAMEWA

Suratul Baqarah aya ta 187:

أُحِلَّ لَڪُمۡ لَيۡلَةَ ٱلصِّيَامِ ٱلرَّفَثُ إِلَىٰ نِسَآٮِٕكُمۡۚ هُنَّ لِبَاسٌ لَّكُمۡ وَأَنتُمۡ لِبَاسٌ لَّهُنَّۗ عَلِمَ ٱللَّهُ أَنَّڪُمۡ كُنتُمۡ تَخۡتَانُونَ أَنفُسَڪُمۡ فَتَابَ عَلَيۡكُمۡ وَعَفَا عَنكُمۡۖ فَٱلۡـَٔـٰنَ بَـٰشِرُوهُنَّ وَٱبۡتَغُواْ مَا ڪَتَبَ ٱللَّهُ لَكُمۡۚ وَكُلُواْ وَٱشۡرَبُواْ حَتَّىٰ يَتَبَيَّنَ لَكُمُ ٱلۡخَيۡطُ ٱلۡأَبۡيَضُ مِنَ ٱلۡخَيۡطِ ٱلۡأَسۡوَدِ مِنَ ٱلۡفَجۡرِۖ ثُمَّ أَتِمُّواْ ٱلصِّيَامَ إِلَى ٱلَّيۡلِۚ وَلَا تُبَـٰشِرُوهُنَّ وَأَنتُمۡ عَـٰكِفُونَ فِى ٱلۡمَسَـٰجِدِۗ تِلۡكَ حُدُودُ ٱللَّهِ فَلَا تَقۡرَبُوهَاۗ كَذَٲلِكَ يُبَيِّنُ ٱللَّهُ ءَايَـٰتِهِۦ لِلنَّاسِ لَعَلَّهُمۡ يَتَّقُونَ ۝

Fassara:

“An halarta a gare ku, a daren azumi, yin jima’i (saduwa) da matanku, su tufa ne a gare ku, kuma ku tufa ne a gare su, Allah Ya sani, lallai ne ku, kun kasance kuna yaudarar kanku. Saboda haka Ya karbi tubarku. Kuma Ya yafe muku. To, yanzu ku rungume su, kuma ku nemi abin da Allah Ya rubuta muku. Kuma ku ci kuma ku sha har silili fari ya bayyana a gare ku daga silili baki daga alfijiri. Sa’an nan kuma ku cika azumi zuwa ga dare. Kuma kada ku rungume su alhali kuna masu I’itikafi a cikin masallatai. Wadannan iyakokin Allah ne: don haka kada ku kusance su, kamar haka ne Allah Yake

bayyana ayoyinSa ga mutane: tsammaninsu, za su yi takawa” - Suratul Baqarah aya ta 187

Kamewa daga zantukan marasa amfani, kamar shaidar zur, zancen batsa, karya, gulma, annamimanci, kamar yadda ya faru a lokacin Nana Maryam; Suratul Maryam aya ta 26:

…إِنِّى نَذَرۡتُ لِلرَّحۡمَـٰنِ صَوۡمًا فَلَنۡ أُڪَلِّمَ ٱلۡيَوۡمَ إِنسِيًّا

Fassara:

“…Lallai ne, na yi alwashin azumi domin Mai rahama, saboda haka ba zan yi wa wani mutum magana ba”  - Suratul Maryam, aya ta 26

Haka nan an karbo Hadisi daga Abu Hurairah, cikin Bukhari hadisi na 1903:

"من لم يدع قول الزور والعمل به فليس لله حاة في أن يدع طعامه وشرابه".

Sannan hatta idan wani ya zowa Mai Azumi da zancen marar amfani, ko ya takaleshi , Manzon Allah (S.A.W.) Ya umarci Mai Azumi da ya kame, ya nisanta kansa da fadawa musu ko zantuka barkatai kamar yadda a hadisin Bukhari, riwayar Abu Huraira mai lamba ta 1904:

…"وإذا كان يوم صوم أحدكم فلا يرفث ولا يصخب، فإن سابه أحد أو قاتله فليقل: إنى امرؤ صائم"

Sauran abubuwan da suke bata azumi da suka kamata Mai Azumi ya kiyayesu; fitar da amai da gangan, fitar da maniyyi ta hanyar wasa da gaba (azzakari) ko ta hanyar kallon sha’awa ga mace walau a zahiri, ko a bidiyo ko ma a hoto; sanya sinadarin abinci a jiki ta hanyar allura (injection) ko waninsa;  Allah Ya bamu ikon kiyayewa amin.

Allah ne mafi sani.

Next Eps: Abubuwan da suke bata Azumi da hukunce-hukuncesu.

___________________

To be continued …. In sha Allah

Aliyu M. Ahmad

25th Sha’aban, 1438 AH

(22th May, 2017 CE)